大仁生活

2014年2月14日星期五

情人節變身金田一逃出密室@銅鑼灣

早前朋友說：「上次去玩逃出密室勁正！（好驚架喎！好似海洋公園哈佬喂嗰啲就真係米攪我？！）一啲都唔驚架，考智力，推理解謎，十足金田一咁架」一提及金田一，我即時上網找資料及訂位，昨日情人節前夕，兩公婆齊齊接受考驗，走到銅鑼灣勿地臣街逃出密室。

預約時間下午2點，我們走到密室大樓，嘩！樓梯，牆壁已經設計得氣氛十足，大門還上了大閘，暗暗沉沉，心想：「撳鐘後電動閘門打開，會不會有個鐘樓駝俠走出來開門呢？」誰知我真的想多了，工作人員只是遲我們20秒從樓梯步行上來，他只是有事遲了少少回來開閘而且。（少少失望）

工作人員LAWANCE：「你哋係咪第一次玩呀？我哋有三層，暫時有三個密室，最難係（阿爾卡特拉斯）我就唔建議第一次嚟嘅人玩，（出埃及記）要上樓梯嘅，不如玩（伽斯底里奧內）關係十二生肖。」

阿太擔心問：「係咪真係無人跳出嚟嚇我哋架？」LAWANCE：「放心！我哋係玩科技，玩機關，十二生肖大約有3關半密室，全部都係考推理，但你哋只有45分鐘破解所以機關咋！」

我又八卦問：「通常有幾多人可以少過45分鐘走返出嚟呢？」LAWANCE：「100組人大約10組人可以成功跳返出嚟！」吓！10份1的成功比率如此低？我心情即時由輕輕鬆鬆變得緊張。

我們首先將手提袋放入Locker，之後LAWANCE給了我們每人一個電筒，再按動計時器，我們的密室考驗立刻開始。不過，因為密室內不准拍照，所以，未能為大家解謎……..。

我可以說約30呎的暗黑密室當中，就算找出了提示，但也要去應付相關的機關，其實並非1+1=2般的簡單。例如明明看到上了鎖的櫃內有可用物件，但偏偏打不開鎖頭，首先我唯有夾硬的把櫃內公事包拉出來，哈哈！好彩的我又真的成功，不過，原來任務是一定要打開木櫃的。我為何會知道呢？因為LAWANCE從外叫咪：「你一定要開鎖先可以過關架！唔可以夾梗抽出嚟架！」

最終我們用了20分鐘才能通過第一關，之後經過走廊，走到第二關，哈哈！一個密碼夾萬，縱使我們猜中了密碼為4位數字，但怎也撞不中0-9的組合，結果，我們走來走去，45分鐘就這樣過去了，鬧鐘響起，我們失敗了！

心有不甘的我問LAWANCE夾萬密碼，他答：「其實你可以叫咪問我哋攞貼士架！（吓！可以嘅咩？）當然可以，不過，我以為你哋想自己解謎，所以無比貼士你，因為真係有參加者唔鍾意人幫架。」

我們出來後，另外一組預約了3時的5人團體就即時接著闖入十二生肖機關挑戰45分鐘。記得剛才第一關大約有5個謎團，我們兩個人，你想少少，我想少少，當成功破解所有機關，大火爐自動打開時，心情真的非常興奮。

我問LAWANCE有沒有限人數的呢？因為人愈多，應該愈快可以破關，LAWANCE：「最多7個人，最少2個人，（吓？唔可以一個人玩架？），因為怕一個人困在暗黑環境，始終唔係咁好。（我想下次帶埋我小朋友嚟再闖12生肖，因為E家好唔甘心！），小朋友有你哋睇住都可以玩，如果下次你哋玩返同一密室，我吔只係收半價架咋！（正喎！）」

我已經決定下次約埋朋友帶埋阿囝，快快再破十二生肖密室，因為現在我的心情十足打機過不到關，但又不能立刻按「繼續」鍵，無得玩心癢非常。我要快快再來挑機！十二生肖你等我來破解你啦！

Facebook : https://www.facebook.com/hayakutang

2014年2月13日星期四

情人節免費的浪漫@尖沙嘴文化中心綵燈會

今日是元宵情人節, 尖沙咀鐘樓文化中心旁有元宵晚會, 哈!! 為何我會知道呢 ?因為我以為綵燈晚會連續多晚舉行, 昨晚已經走了去拍照, 原來一切更精彩今晚2月14才有得玩.

雖然, 攤位表演, 樂隊演唱, 舞金龍等今晚才有得欣賞, 但靚爆的綵燈裝置整個月也長期亮著任看.

「LOVE」非常熟悉的LOGO, 東京新宿電車男等愛瑪仕的地方, 台北101大樓的地標, 紐約第57街一樣有「LOVE」.當然他人的是雕塑品, 今次鐘樓的是綵燈裝置

這個綵燈展命名為《情意漫遊》, 用不同地方的結婚儀式做主題, 有傳統的中國「迎親」, 歐洲皇室婚禮, (其實我覺得似凱特和威廉王子多一點), 日本和服及韓國大長金, 當然還有最公式的婚紗與禮服.

看宣傳單張, 今晚還有猜燈謎環節, 題目會不會貼滿在這所2個人高度的大花燈上就不得而知, 不過, 最重要答對會不會有禮物呢 ? 如果每答對一條就可獲贈鮮花一支也不錯吧!

雖然今晚「Pre情人節」天氣只有8度, 但很奇怪的走到這浪漫「爆燈」的鐘樓底竟然真的不覺凍, 可能幾千甚至上萬棵燈泡照亮著的原故, 又或是我感染了現場各情侶們的愛的力量呢 ?

Facebook : https://www.facebook.com/hayakutang

2014年2月12日星期三

阿囝造曲奇愛愛愛心心@無印MUJI Jam Sandwich Cookies

朋友知道我們一家最愛吃曲奇，前星期送了一盒無印MUJI的玻璃心心曲奇給我，滿心歡喜拿回家準備和阿囝一齊吃，誰知阿囝打開說：「爸爸！又話有曲奇食？無嘅？」

原來這是自製曲奇餅的材料，盒內只有2包大麵粉，2包小果醬，一個心型模型及一些小小的裝飾袋。於是我請阿太幫手造，阿太接過包裝看了之後說：「我哋屋企都無焗爐點做呀？」

當時心想：「哎呀！咁米浪費晒！微波爐可唔可以整嘅呢？」……本來事情就這樣擱置了，直至昨晚放工回來，阿囝和阿太親手遞上滿心心的玻璃曲奇，嘩！好靚呀！阿囝說：「我同舅父仔同媽媽一齊造畀你食架！」嘩!! 那一刻又驚喜，又感動。

原來阿太襯放假，帶阿囝回外家找經常鑽研咖啡及西餅的舅父仔幫手，一同造出這十多件玻璃心心曲奇。阿囝說：「媽媽以為打開個盒就可以做，唔係架，舅父仔仲要落街買牛油同牛奶架。」

我問阿囝你識得造蛋糕？阿囝答：「識！舅父仔將牛油同牛奶攪混，之後教我用手搓搓搓，然後要放入雪櫃架！」

阿囝問媽媽：「幾耐先攞返出嚟畀舅父仔切開一塊塊呀？（阿太：10分鐘）爸爸，凍十分鐘，舅父仔就用刀切細啲曲奇，切我就無份，不過，之後喺曲奇度用膠心心吸個心出嚟，就係我造嘅。」

我問：「咁之後就可以食未？」

阿囝：「未！梗係未，唔駛焗咩？曲奇同吸出嚟啲心心都要焗，果時啱啱做加菲貓，做到廣告舅父仔就話得，之後我米加啲橙同士多啤梨果醬喺曲奇個窿窿度，咁米食得囉！好簡單遮。」

阿太：「本嚟我哋諗緊駛唔駛係兩塊曲奇中間搽啲醬，原來唔駛架喎，啲曲奇一乾咗之後，底同面嗰塊就自己會黐埋一齊架喎。」

我致電多謝舅父仔，因為我知道其實他要處理自己的皮革生意好忙，今日還要被一老一嫩煩足半天，舅父仔笑笑：「因為屋企個焗爐太CHEAP，所以啲曲奇焗出嚟，有啲比較燶，有啲就OK，味道就無問題架啦！」

其實，不單止阿囝好開心，我也不捨得吃，阿囝送了兩塊給朋友吃時還大聲強調：「係我同舅父仔一齊做架，不過媽媽就負責影相比爸爸睇遮。」

Facebook :https://www.facebook.com/hayakutang

2014年2月11日星期二

電腦肩救星唔駛搵必理痛止痛貼 12蚊店攪掂

經常用MOUSE，右手手腕一直痛，近幾年更開始一直痛上頸，所以經常要靠頭痛藥止痛，早前朋友見我頸痛，建議我去「AEON12蚊店」買支按摩棒，心想：「12蚊店都有好野？係真唔係呀？」昨晚經過信和，於是百無聊賴的我就走過對面馬路12蚊店逛逛。

電視廣告說必理痛止痛貼有效消除電腦肩，不過最麻煩的我又皮膚過敏不能貼這類鎮痛貼呢！

一上到時創興三樓，人山人海，找了一遍也找不到按摩棒，於是去問女店員，終於發現了原來有一堆按摩棒，朋友推介的是U形膠棒，女店員說:「另外一款軟身的更加好用架!」，我兩款也放上頸試試，U形的那款左右各有一個凸出部份，剛剛好可以按中我頸部最痛的位置，舒服！右手的麻痺也可以即時減輕。

不過女店員推介的那款，則需要自己左右移動，可能我的頸背沒有衣服，所以左右拉動時綴著皮膚，不太舒適，最後，我決定買兩支U形棒，一支返工用，另一支則放在家用。付款時另一位女店員見我一邊按摩，一邊對阿太說:「真係幾好喎!!」，女店員竟然答我：「真係好用咩？（係喎！我長期頸痛，按左幾吓真係無咁痛咁喎！）咁我放工都要買返支！」

本來，我每日都要食一粒頭痛藥，這兩天也不用吃頭痛藥。哈！看來前晚買回來的6盒特強幸福止痛素，可以留回日後慢慢食。

PS：特強幸福止痛素又是另一朋友推介，價錢較必理痛更便宜，前天開始萬寧，屈臣氏售價竟然做特價，售價較出面藥房更便宜，我也掃了6盒。

Facebook : https://www.facebook.com/hayakutang

2014年2月10日星期一

讓我數著年輪　這些年輪　好食得過癮@SOGO JUCHHEIM 年輪蛋糕

新正頭去親戚屋企拜年，走到銅鑼灣SOGO地庫，忽然見到Juchheim大廚在切牛扒一樣忙著在切年輪蛋糕，肚餓的阿囝看到大叫：「好想食呀！爸爸」。

隔著透明玻璃窗，看著大廚在切著切，加上開放式廚傳來烤蛋糕的香味，不過望到宣傳上要$1350元，有點卻步，於是問問店員售價，原來，年輪蛋糕分5款，可供50至70人用的原子彈大的才要賣過千，最便宜的只需$58元，本來新年限定有綠茶口味，但因為怕阿囝吃不慣，所以安全起見還是點了原味。

店員說：「因為最細SIZE 的牛油雞蛋味無真空密封，要3日內食完」飯前甜品，其實我一個人也可以KO，更何況今天8人共享，絕對無問題！

本來想買朱古力味，但新年停售，要之後每逢星期一至三才可購買，如果要買咖啡則只可以星期四至六才有售，其實又會限定得如此新穎呢!!

拿到大伯家，阿囝已急不及待的要打開年輪蛋糕來吃，他還要學利孝夫人進行切餅儀式，激死!!

真的不要看小這年輪蛋糕，質感較所有港式蛋糕來得豐盛。一層一層薄薄軟軟的蛋糕，緊緻的貼在一起，如果我沒有數錯，應該一共有13層，蛋好香而且最正是不太甜，最外層加上糖霜，成為了最點綴的部份，好味道，好吃，好吃！

Facebook : https://www.facebook.com/hayakutang

2014年2月9日星期日

「錢罌」我啱 @ 將軍澳中心忍者小靈精Vs小雲唐老鴨Vs米奇老鼠

上星期看報紙，忽然發現有老夫子，米奇老鼠懷舊錢罌介紹，原來文章正在宣傳將軍澳中心的一個歷代錢罌展，懷舊東西我最啱。

所以即使今日中午我要去荃灣，下午亦即時坐約一小時地鐵去將軍澳睇錢罌。

展覽主要分為三個展區，「古代系列」包括漢、唐、宋至滿清年間的瓷器錢罌。老實說，自己興趣不大，因為太傳統又沒有卡通人物，不過，拍照後，我開始有少少懷疑這些是否真的屬於標示的年代呢？因為明明有一個金豬錢罌，很明顯是為大會設計又有名人簽名，為何會列為「明朝」錢罌？

另一個展區就是本地銀行（渣打＋匯豐專區），這區吸引力大得多，不看不知道原來一直以來渣打銀行也愛送出迪士尼的卡通錢罌，單單是唐老鴨就已經有5款之多。

米奇老鼠，小飛象，前兩年一次以整個香港迪士尼也出了一次。匯豐早年送的銅製獅子我也擁有過，但1973年匯豐推的獅子點解樣子十足十獅頭嘜花生油呢 ?

展場中有一個最吸引我的就是一本60年代的紅簿仔，我望了很耐這本半開的紅簿仔，1960年這本紅簿仔的主人已經不時存入$100元，我還看到$500元的存款，嘩！50年前竟然可以第二頁已經有千多元的儲蓄，當年不知是否足夠當首期呢？

第三個展區就是我最感興趣的錢罌集體回憶，海洋公園的覽車，香港保險的兔仔，80年代成語動畫廊的熊貓博士及YY助手(是TVB出的嗎 ? )，家樂氐粟米片的老虎，還有可口可樂的積木錢罌，款款也熟口熟面。

因為早前J2重播了忍者小靈精，所以很多大朋友，小朋友一看到小靈精也叫得出他的名子，還有龍珠少年版悟空這些用瓷器製成的錢罌，大多數估計是香港出產的土炮貨。

而因為自己也有收藏一些日本企業物公仔膠錢罌，所以一看到住有銀行的軟膠叮噹，富士銀行的大空人，還有勸業銀行的小娃娃，不禁想到為甚麼收藏家楊維邦先生今次借出那麼少的日本系列錢罌呢 ?

今日很多父母也帶同小朋友來「睇錢罌」，而今日我一邊看展覽一邊聽得最多的就是：「哎呀！E隻錢罌我以前有架。」「爸爸以前有E隻獅子架，上次搬屋唔見咗！」他們爸爸的說話正正也是我的心聲，為何當年我會掉了匯豐的銅獅子和渣打的唐老鴨呢？

Facebook :https://www.facebook.com/hayakutang

2014年2月8日星期六

「南丫島」真係好好好多野食!! 點食都食唔晒!! 切忌衰心急!!

一年一度的新春效遊團，今年我們揀選了南丫島半天遊，由榕樹灣出發一面食一面行去索罟灣，不過原來今時今日的南丫島，特色食肆多得不得了，我們只能試食其中數間。

我們大約下午2時落船，由於太肚餓關係，所以一開始已分頭行事，兩位阿太先到牛記排隊等位，其餘人就到「南丫島地道」排隊買格仔餅及雞蛋仔。為何我們要光顧這檔雞蛋仔呢 ? 因為之前元朗年宵老闆娘有份擺檔，人龍不絕，老闆娘知我會入南丫島所以大力推介我。

排隊期間我又八卦問老闆娘南丫島那裡有好食地方，她答：「無！全個南丫島無一間好食！」（吓！唔係呀？）老闆娘繼續：「勉強前面間龍華酒家嘅小炒啦，無味精就呃你，少少啦，幾野味嘅，不過今日初四我都唔去食喇，好似加二定加三架。」

我再說：「咁我下次再嚟先試啦，咁你地叫對面外賣嘅喱間Pizza Milano呢？」老闆娘一面指揮店員一面答：「都係麻麻地，唔差咁啦，你可以試下嘅。」

PS：（多謝好人老闆娘的推介，不過至於華記的雞蛋仔⋯⋯其實我又不能因為老闆娘好人而盲目說好食，唯有說可能她們的大大粒炸魚蛋會更好食吧！）

今日最後悔就是浪費了肚皮吃牛記的公仔麵，好彩的是因為前檯人士點的炒飯炒麵，於30分鐘後還未上檯，於是他們憤然棄單離去。所以，我們即時有檯，並點選即食的雞翼麵及餐肉米粉。等待時間大約10分鐘，我最初以為公仔麵是隔離檯的食客，於是正想讓給他們之際對方說：「唔係！唔係！我哋叫炒飯。（哦！我哋遲過你哋嚟，咁你哋等咗幾耐呀？）起碼半個鐘以上⋯⋯」

牛記人多，主要原因是地理位置優越，人山人海，店員做不停手，但食物質素可以用「難食」來形容。「乾憎憎」的公仔麵，「淡茂茂」的米粉，我對「團友」說：「我到對面Pizza Milano點定一個Pizza，你哋埋單後過嚟食啦！」

因為我太肚餓，我一入Pizza Milano，即時問店員最好食的Pizza是那一款，於是就點了招牌Pizza。後來我才發現這裡竟然有Calzone意大利餡餅，早知一早點Calzone，只怪自己太心急。

不知是我太肚餓，還是團友之前吃的食物太噁心，他們都異口同聲：「雞蛋仔老闆娘果然無推介錯喎！好味道！」看來如果一早點Calzone，餡料更juicy，味道一定會更豐富更好味!

吃完Pizza，我們又走到旁邊的Jing Jing Bar吃慕斯嘆茶嘆咖啡，Jing Jing Bar於下午3時多已經有大批酒客在店內把酒談心，我們坐在店外Bar檯，風和日麗下吃著冧酒慕斯，忽然很有自在感覺。不過，悅悅小朋友不愛冧酒的酸味，差不多整個慕斯也被阿囝吞了落肚。

Jing Jing Bar再往前走少少，我們又見人龍，這條人龍正在輪候進入南島書蟲CAFE，南島真的裝修如同樓上書房一樣，不過同行團友堅持非常飽及不想吃齋的緣故，所以，我也不能排隊進入，但看到店員端出來的熱辣辣食物，賣相非常吸引，團友說：「快啲行啦！我哋食咗兩個鐘都未行得呀！天黑都未上到山頂啦！」

之後，團友看到早前網上推介的曲奇，店前擺滿又杏仁，又朱古力，我們問老闆娘那一款好食，她說：「咖啡啦！近排唔知點解多人買喎！」阿太和我也不太好咖啡，所以我想買只賣剩一盒的杏仁味，不過最後阿太為了阿囝還是選了朱古力原味。個人覺得咖啡味比較苦，曲奇還是原味好食。

再走幾步，剛才說飽的團友又說串燒很香，齊齊買了燒香腸及燒雞翼，我心有不甘的說：「你哋又話飽？E家又食得落串燒嘅？」團友一啖一啖食著串燒好忙的回應：「我哋個肚分開正餐肚，小食肚同糖水肚架麻」

話口未完，她們的串燒還未完全落隔之際，竟然右手邊山邊出現一檔由泰國人煮理的風味ThaiThaiFood串燒，香味由樹間透出來，我說：「嗱！睇嚟E檔先夠野味喎。」因為他們不想再重複多吃一次，所以，我們改小吃泰國香芒片，自助式付款，沒辦法因為太多人光顧，店員根本無遐兼顧。不知是否天氣悶熱，吃一片泰國芒，好好好清甜，十足吃石榴一樣清新，正到不得了。