【Big Cup椰青波】清爽甜 一D都無嘥!! 成個食得晒

相隔5個月, 今日再去九龍城找豆姨姨, 阿太問:「你又去買BB菠蘿仔?」, 我:「BB菠蘿仔要買, 不過今次主打「Big Cup 椰青波」」

我望著放在店前四個透明膠囊盛好的去殼走皮椰青波, 好奇問Eric:「你可唔可以即場切, 畀我拍片呢?」

Eric答:「係泰國寄過嚟之前, 嗰邊已經切好晒架, 因為唔係個個椰青可以切到, 一般10個只揀到3個嚟切架」

(點解有D椰青波穿咗嘅?) Eric答:「運過嚟嗰陣, 有D肉軟身D就好容易撞穿, 所以, 未穿嘅, 肉會爽D, 穿咗嗰D, 椰肉會腍D, 軟D」

「Big Cup 椰青波」$35, 我專登買一個穿, 一個未穿的來比較, 30度的下午, 單單插一支飲管, 已經可以飲到又清又甜的椰青, 透心涼到爆.

不過, 我發現原來未穿的椰青波, 椰青水更甜更潤更濃...椰青, 椰汁我都鍾意, 但偏偏SY卻耍手擰頭:「都唔好飲, 唔要」(咁清甜, 試都唔試, 嘥料)

時間過了大約半小時....15:35, 當我想外賣多一個「椰青波」回家, 豆姨姨大叫:「賣晒啦, 要星期三先再有貨返Lu!」. 不少街坊失望答:「吓? 咁快就無晒?」

豆姨姨:「放心呀! 我哋一箱有30個, 會返好多箱」. 老實說, 椰青波100%完完全全可以食入肚, 感覺抵過花園街買的椰青, 阿太:「梗係啦, 花園街嗰D點食到入面D肉呀?」

先有「BB菠蘿仔」, 今日有「Big Cup 椰青波」, 超期待豆姨姨再引入更爆的泰國小食過來香港, 豆姨姨:「會呀! 我就係鍾意賣新嘢, 人人都賣同一樣嘅嘢, 都唔特別啦 」

PS: 豆姨姨「BB菠蘿仔」真係好食過出面嗰D短期租約舖好多!!

豆姨姨泰國新鮮雜貨
九龍城賈炳達道61號地下
90869822


大仁生活facebook