身為商場精的我, 從未試過跳出香港巡場, 今日過大海, 當然順路探一探小丸子啦!!
心諗:「澳門睇展覽要$120/位, 其實我哋香港人真係幸福, 次次都免費, 仲要久唔久有Mascot集郵添」
澳門會展中心就在機場對面, 本來不識路的我, 氹仔碼頭職員教路:「駛鬼坐的士吖, 任何一部巴士, 第二個站落車就係機場, 走過對面就係囉, 15分鐘都唔駛」
穿過「金皇冠中國酒」, 就是小丸子的會場...當大家一進場, 便可以即時感受到收錢與免費的展覽, 規模可以有多大的不同啦!!
澳門的場地大大大大大得多. 如果要比較, 可能相等於十個香港區TheONE的場地.
一開場, 已經是櫻桃家的正門情景,
小丸子一家6口就在前園迎接我們.
SY:「真係小丸子屋企嚟架...不過平時食飯, 佢哋唔係咁坐喎...小丸子坐隔離...婆婆就...」(因為同愛‧回家一樣, 鏡頭前個飯枱嗰邊係唔可以坐人呀)
阿太:「今餐好好餸喎, 又有天婦羅, 又有魚生, 應該係大節日先食咁好」(我都唔知妳咁意劇情喎)
澳門地方大, 真的每一間房也可以完全忠實還原, SY:「廚房真係有兩個真橙喎」(可能假橙難搵掛, 不過, 印象中日本人好似好少食橙)
阿太:「你睇姐姐鍾意秀樹, 小丸子鍾意白惠, 真係跟到足喎」不過, 這場兩姐妹鬧咬的情景,
我又很很有印象喎.
本來還有三個房間, 但SY已經一早被家外的另外情景所吸引, 走了出去...
這張躺在露台午睡的合照, 是我出盡九牛二虎之力,
拉他回來扮「瞓覺」的.
SY:「我最憎就係瞓覺, 我又唔係子丸子」很奇怪, 我和阿太都愛「多睡唔起」,
為何會生了一個不用睡覺的小朋友. (7歲人仔, 每日可以只瞓7-8個鍾, 就精神奕奕)
第936話中, 小丸子唯一被迫變了髮型的一集, 這個髮型屋亦有在這個展覽中出現. SY:「小丸子剪咗頭髮, 好似個BB, (你無睇過E集咩?), 無喎」(我仲以為你睇晒咁多集添)
之後的課室, 真的是一個1:1的3年級班房. 有理由相信, 這可以做一個真實補習用教室都無問題.
SY:「哦!原來E度有寫, 小丸子係永遠都係3年班, 唔掛得知, 我讀K3嗰時, 佢讀3年班, 我升咗班, 佢又係3年班啦」 (唔講我真係唔知, 佢唔會升班喎)
班房有日本書包可以借來拍照, 但我始終不明白, 為何野口及, 小渚同學永遠都瑟縮在情景的一角呢?
會念詩的爺爺, 我覺得如果識日文, 可能笑點會更強烈.
有課室竟然更有運動場, 拔河, 接力, 射籃... SY:「E度真係一個運動會嚟架喎」, 我:「係!$120蚊果然無欺場」
阿太:「E度真係大得好緊要」如果要拍小丸子真人版, 應該也完全不成問題.
運動場的出口有一個鳥居, 穿過紅色鳥居就是節日祭的公園...SY:「同上星期睇小丸子電影呢...佢同安德魯去嗰個水燈節係一樣呀!」
大家記得要換一換大會借出的浴衣...好襯節日祭的氣氛喎...如果, 大家有緣, 周末可以有機會撞到真‧爺爺出來合照呀!
可惜, 我們太趕時間, 等不到爺爺...唯有跟葡國雞小丸子合照就算吧!
完場前, 所有場景變了澳門, 大三巴, 官也街, 媽閣, 三輪車....連SY也識答:「E度係澳門專區囉」
為了趕到另一個行程, 唯有在極不捨得情況下, 跟小丸子說再見...SY:「爸爸, 我唔想走呀!! 不如買個小丸子返香港啦」
姑寒的我答:「阿囝...不如我哋攞住影張相就當買咗啦....」
日期:7月1日至9月11日
地點:澳門會展中心(機場對面)
費用:$120
查詢:2380 5083
大仁生活facebook
沒有留言:
張貼留言